- 602 -

1430. Aug. 29. Cotzenau.

Elyszabeth von gots genaden herczoginn zcum Brig etc.
Vnseren besundern grusz zcuuor. Ersamen, lieben getrewen, wir haben mit den fleisscheren gereth, wie dassy vns suldin an vnserem czynse auszrichten czehen marck dowider sy sych eczlicher mosse seczen, bithen wir euch mit fleisz, das ir ernstlichen mit in reden wollet, dassy vns mit eynem solichen vff diszmol nicht lossen, wann wir den soldenern zcum Goltberg haberen vnd czerung douon auszrichten mussen vnd wo des nicht geschehe alse das wir haberen vnd andir dinck zcu den wirten beczalen salden, so kwemen wir mit der gelt czweyen nicht zcu do wir sust mit eynem zcukumen mugen, hirvmbe so wollet ewern fleisz in disen sachen thun also, das wir von den genanten fleischern nicht gesewmpt werden, doran ir vns sunderlich gute dinste geweist, wann wo des geschehe, also das wir sy nicht hewte auszrichten mit haberen, so haben sy vns furwar geschriben, dassy nicht lenger do beleyben wollen, wenne denn das gelt gefalle, das man von stunden czwey malder haberen kowff vnd schick sy kein Goltberg. Geben vnder disem sigil, wann wir vnsers by vns nicht enthalten czu Kocznaw am tag Johannis decollacionis anno domini etc. XXX mo.

Rückaufscbrift: Den ersamen vnd weisen, burgermeister vnd ratmannen der stat Legnicz.

Org. Kgl. Bibl z. Berl Ms. Boruss. f. 567 No. 8.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866